قلمي 🖊️ بندقيتي
يقول أحدهم:”مبارح وقبل آذان المغرب بوقت قصير، كان في شاب أردني بأول العشرينات، شغال بتوصيل طلبات الطعام…شاب طالع يركض ورا رزقته بالحلال، بعيد عن بيته، ما لأنه حاب يفطر بعيد عن أهله، لكن لأنه بده يساعد أهله، يصرف على حاله، ويكمل جامعته مثل أي شاب عنده حلم.فجأة إجاه طلب جديد..،طلب عادي جد، زي مئات الطلبات اللي بتيجي كل يوم، وجبة دجاج بروستد ٨ قطع معها مقبلات بطاطا، ومشروب غازي.الشاب قال بينه وبين حاله:يا رب ألحق أستلم الطلب بسرعة وأوصله قبل الآذان.”
وفعلا، راح على المطعم، استلم الطلب، وطلع باتجاه اللوكيشن..،،
ولما قرب يوصل، رن على الرقم:”ألو السلام عليكم، أنا هيني قربت من الموقع.”
الرد كان بصوت زلمة، مبين عليه الطيبة والحنية:وعليكم السلام ورحمة الله، صحتين وعافية يا عمي، هذا الطلب أنا طلبته فطور للسائق اللي بده يوصل الطلب، وطلع نصيبك أنت…استريح بأي مكان، وافطر وادعيلنا، وادعي لأمي بالرحمة بهاي الأيام الفضيلة.”الطلب كان مدفوع فيزا،يعني كل شيء محسوب وواصل…الشاب بحكي:”والله هالموقف بحياتي ما رح أنساه، لأنه فعليا ما كان معي غير شوية تمر ومي أفطر عليهم”..يا الله…وقف سيارته الصغيرة على جنب الطريق، فتح الوجبة وأكل، ودعا له، ودعا لوالدته بالرحمة من قلبه…تخيلوا، إنسان قاعد بمكانه، قرر يفطر صائم ما بعرفه، ولا عمره شافه بس لأنه بده الأجر..وهذا هو الخير اللي لسا موجود بين الناس…قديش عظيم شعور إنك تفطر صائم؟يمكن وجبة بسيطة تغير يوم إنسان كامل…ويمكن دعوة صادقة توصل للسماء قبل أذان المغرب…الحمدلله إنه لسا في بينا هيك قلوب..والله يجزي كل إنسان بيفتح باب خير لغيره ألف خير.🤲